Терроризма духьалара кхетаче дӀайихьар МагӀалбика кхале
Терроризм яхача зулама духьалара «ТӀехьенашта юкъера къамаьл» яха кхетаче дӀайихьар Дебе-Юртарча культуран ЦӀагӀа. Тайп-тайпарча ханашка кхаьча нах гулбеннабар цу кхетаче дакъа лаца.
«Гулбеннарашта хьалхашка къамаьл деш хилар Халкъа Гуллама депутат вола Олиганаькъан Бадрудин, «ЦаӀ йола Росси» яхача парте моттигерча исполкома хьалха латта Кхоартой ИбрахӀим, МагӀалбикерча депутатий кхален совета кулгал деш вола ГӀулой Къурейш, МагӀалбика кхалерча терроризм яхача зулама духьала къовсам лоаттабеча комиссена хьалха латта Джамболатанаькъан Мухьмад, иштта кхыбараш а», - дийцар «Сердалога» из кхетаче дӀахьош хиннараша.
Цига белгалдир, къонача тӀехьенна, боккхагӀчарна юкъе массахана бувзам хила безилга. Кагирхой аьттув бар моллагӀа хаттар цига дашха. Иштта йола кхетаченаш дӀакхахьар лоархӀаме болх болга, кхувш латтарашта цӀагӀа, дешача моттигашка терроризм эггара доккхагӀа, бӀехагӀа дола во долга, цхьаккха хӀама бекхам боацаш дусаргдоацилга хьалхадаха дезилга белгалдир цига.
