Федеральни проектага гӏолла, спорта лаьрхӏа керда моттиг хьалъеш боахк Магӏалбика кхале
Таханарча ханага хьежжа йола спорта моттиг хьаелларгйолаш, болх дӏаболабаь боахк тахан Инаркъе. Физически культуран, спорта хӏама доаржадарах йолча федеральни проектага гӏолла дӏахьош болх ба из. Кхален моттигашка спортаца дувзаденнараш меттадоаладара тӏехьа боаккхаш лоархӏаме гӏа ба из. Гаьна баха ца безаш, шоай цӏен юхе хӏара денна спортаца бувзам лелабе йиш йолаш хургба бахархой.
«Вай мехкадас Келаматанаькъан Махьмуд-Ӏаьлас геттара хьаллоацаш гӏулакх да из тахан. Хьалхара балхаш дӏадоладаь, кӏалхара кӏийле тоаеш, кийчъеш боахк цига. Белгалде деза, спорта лаьрхӏа керда, таханарча ханага хьежжа йола моттиг хьаеллар юртарча наха доккха совгӏат хулаш хӏама долга. Къаьстта къонабарашта боккха тоам беш да из», - дийцар «Сердалога» Магӏалбика кхален администраце.
Спортаца дувзаденнараш тоадара, доаржадара йоккха терко еш ба Магӏалбика кхале. Зехьа ха йоаеш, дер дайна лела къонабараш кӏезигагӏа хилийтара тӏехьа лоархӏаме болх ба из. Кагирхой аьттув хургба тайп-тайпара яхьаш дӏакхахьа, спортацара бувзам чӏоагӏбе. Муниципальни хьакимаш, уж проекташ хьаллоацаш, юрташка цу оагӏонцара хьал меттадоаладеш ба.
