«Коталон гӏа баккхар» яха жӏакай яхь хилар Магӏалбика кхале
«Коталон гӏа баккхар» яхача Даьхенцара безам чӏоагӏбарах болча боламга гӏолла, жӏакай турнир дӏайихьар Магӏалбика кхале. Боккхача тӏем тӏа Котало яьккха 81 шу дизара хетаяь яр яхьаш. «Цаӏ йолча Россе» хьаллоацаш, «Жӏакаш – вайбарашта лаьрхӏа» яхача проектага гӏолла дӏахьош яр Къилбаседа Кавказа доагора-энергетически колледже йоаржаеш хинна яхьаш.
«Массаболча жӏакех ловзараша лакха говзал гойтар цу яхьашка. СВО доакъашхошта юкъе котбаьннараш бар Ховтанаькъан Тайсам, Даскенаькъан Аласхан, Оздой Казбек. Къахьегама ветеранашта юкъе белгалбаьлар Хамхой Ӏаддал-Мажит, Лаьнанаькъан Беслан, Гӏоандалой Мухьаммад.
Котбаьннарашта совгӏаташ луш, баркал оалаш хилар яхьаш чакхъялар, хӏаьта эггара лоархӏамедар - из болам Коталон ди гаргадоаладе гӏерташ лаьттараш дагабохийташ хилар дар. Белгалбаьннарашта совгӏаташ луча дакъа лоацаш хилар Халкъа Гуллама депутат Гӏулой Къурейш, колледжа кулгалхо Чуранаькъан Мустафа, кхален кхела депутат Ӏаьленаькъан Дауд», - дийцар «Сердалога» «Цаӏ йола Росси» яхача парте моттигерча даькъе.
Жӏакех ловзар сабар, кӏоарга уйла е хар эшаш хӏама да. Спорт йоаржаярал совгӏа, вай бӏухой оагӏув хьаллацара тӏехьа дӏахьош болх бар из.
