Магӏалбика кхале ЖКХ, предпринимателий балхах дувцаш; кхетаче хилар
Магӏалбика кхале дӏахьош хиннача кхетаче дийцар коммунальни даькъ тӏара, къайлагӏа мах беш йола моттигаш хилара дешаш. Кулгалхочун гӏончаша, доакъой кулгалхоша къоастадир хица дувзаденна хьал, коммунальни хьалаш лоаттадарах йоал гулъяр, иштта къайлагӏа мах беш йола моттигаш гучаяхарах дола дешаш. Керттера ӏаьдала декхар да коммерци лелаеча даькъ тӏа цхьоагӏо яр, из болх нийсача новкъа баккхар.
«Дийцача хаттарашта юкъе дар Магӏалбика доал деча кхален даькъ тӏа хьакхоачаш дола хий малагIча боараме да хьожаш тӏахьожам лоаттабар. Белгалдир хицара хьал тоаде дезилга. Къаьстта йола терко тӏаяхийтар къайлагӏа мах беш йола моттигаш гучаяхара. Цу даькъ тӏа дӏахьош бола болх дика ба, аьнна, хьоахадир. Кхетачене хьежар коммунальни декхар гулдара гIулакхага. Дӏахьош болча балхага хьежжа доацаш, декхар тӏадиллар из болх кхы а чӏоагӏагӏа лелабара. Бахархошца бувзам лелабеш, лоаттадеча коммунальни хьалех мах гулбе беза, аьлар», - яхаш дийцар «Сердало» газетага Магӏалбика кхален администраце зарбан болх лелабераша.
Кхетаче чакхйоалаш кхален кулгалхоша белгалдир керттера декхараш, уж кастлуш кхоачашде деза. Администраце доакъой кулгалхошта, ха а хоадаеш, хьалхашка декхараш оттадир. Цига тӏаийца уж кхоачашдаьдий хьожаш, болх дӏахьоргба аргӏанара кхетаче тӏакхаччалца.
