МагӀалбика кхале дӀайихьар аргӀанара йоаца ЧС комиссе кхетаче
МагӀалбика кхален администраце аргӀанара йоаца кхетаче дӀайихьар, цӀера кхерамзлен чоалхане хьал дувцаш. Из дӀаяхьар бахьан дар, цӀаьхха, нийсденна хатар - газ ийккха моттиг нийсъелар наджгоанцхой бетта 6-ча дийнахьа СоагӀапчарча цхьан фусаме.
«Цу хатара юкъе нийсвелар ворхӀ саг, уж берригаш а МагӀалбикан кхален керттерча дарбанче дӀабигар. Наджгоанцхой бетта 14-ча денга кхоачаш, царех кхо саг дӀахо дарба деш ва, уж хала човнаш хинна а ба. Цу моттиге лоаццача хана хьакхаьчар кхален, юрта администрацей викалаш, сихача тӀахьожама гIулакха болхлой, цар шоай болх дика вӀашагӀбелла дӀабихьар», - аьлар «Сердало» газетага Магӏалбика администраце зарбан болх лелабераша.
Нийсденнача хатара хьал массайолча оагӀорахьара довзара, кхален администраце сиха вӀашагӀъеллар боахамашта юкъера кхел, цо къоастадир хинна зе, нийсденна хьал.
Технически балхашца цхьана дӀахьош да хиннар тахкара дола балхаш а, цу юкъе тохкама болхлой а болаш. Ший аргӀагIа газа къахьегамхой хьожаш ба бахьан мичара хьадоагӀаш да. Дӏахо лоравалар цох тийша хургда. Кхален администраце зулам хинна дезал хьаллаца лаьрхӀар вахаре эша гӀо дарца. Цар кхайкарал дир, сагото ена боахка нах хьаллоацаш йолча республикан ганзашка.
