Дешара, Ӏилман Министерстве; «Бурчолг» яхача яхьашка котбаьннарашта совгӀаташ делар
ГӀалгӀайчен дешара, Ӏилман Министерстве совгӀаташ делар, гӀалгӀай меттала дӀахьош хиннача республикан «Бурчолг» яхача берий яхье котбаьннарашта. Из яхь дӀаяхьара керттера бахьан дар, царга дикагӀа гӀалгӀай мотт бувцийтар, из царна безабалийтар, иштта царна карагӀдоалар гучадаккхар.
«Яхье дакъа лоацаш яр цхьа ткъаьх совгӀа деша даха ха йоацача берий моттигаш. СовгӀаташ луча дакъа лоацаш хилар ГӀалгӀайчен дешара, Ӏилман министра декхараш кхоачашдеш вола Цхьорой Ахьмад-Башир, цун гӀонча Угурчанаькъан ПаьтӀамат.
Цар даькъалабийцар яхье дакъа лоацаш хиннараш, дег чура доагӀача дешашца, иштта къамаьл а хилар царца», - аьлар «Сердало» газетага дешара, Ӏилман Министерствон зарбан болх лелабераша.
Белгалдаккха деза, кхелахоша мах оттабеча хана, теркалдеш хиннар дар актёрски говзал, хьаоалаш дола дош цӀена хилар, йоазув де хар, спектакль хоза оттаяр, ашарий оагӀув, тӀера гӀирс дика кийчбар. Яхь йистеяьлча, котбаьннарашта дипломаш делар. Дакъа лаьцарашта сертификаташ делар.
