Юртбоахаме къахьегарашта лаьрхӀа, кхетаче дӀайихьар министерстве
Тайп-тайпара дола лазараш дӀа-хьа ца даржийтара тӀехьа, бе безача балхах дувцаш, кхетаче дӀайихьар юртбоахама гӀулакхах йолча Министерстве. Цу гӀулакха хьалхалаттараш яр ООО «Симбио», ООО «Ингкорм».
Из хоам «Сердалога» бир министерстверча зарбан болх лелабераша. Хьайбаш, коа тӀара оалхазараш леладеча фермерашта, хьайбай лорашта боккха пайда луш яр дӀайихьа семинар. Хьайбашта, оалхазарашта хулаш дола кхераме лоархӀа лазараш даржаргдоацаш де дезараш белгалдир цига, лазараш дӀа-хьа кхухьаш долча дийнаташта духьала бе безача балхах дийцар.
«Хьайбашта маьхий тохаш, лазарашта духьала де дезараш чакхдоахаш, эшаш йолча хӀамашца мишта болх бе беза гойтар кхетаче. Из болх тахан лоархӀамечарех ба хьайбаш, оалхазараш леладерашта. Ханнахьа, боаггӀача боараме дӀабихьача балхо воча лазарех кӀалхардоахаргда, Даьла къахетамца, хьайбаш, коа тӀара оалхазараш. Геттара лакха йӀовхал эттача, хулаш долча лазарашта духьала де дезараш а белгалдир цига.
