Лорий лазарашта духьалара болх дӀахьош хиннача Тиймарзанаькъан Маккас дийцар гулбеннарашта, мел чӀоагӀа сага могашала Ӏаткъаш я гӀаьле. Цул совгӀа, геттара во лоархӀаш йола гӀаьленаша хьахьоадеш дола лазараш а белгалдир.

«ГӀаьлен тхьамка массайолча дегӀа маьженашта Ӏаткъаш да. ГӀаьле озаш хиларо хьатӀайоаккх инфаркт, инсульт; иштта къамаргашта, багенна, пехкашта цӀийоацар оала лазар; астма, кхайкор, хьоа талхар, иштта кхы а дуккхадараш. Саг гӀаьле дукха увзаш вале, лазарашта духьалъоттара низ цун кӀезигагӀа хул», - аьлар Тиймарзанаькъан Маккас.

Къамаьл йистедоалаш, доакъашхошта хьалхадаьккхар (къайлагӀа хургдолаш) гӀаьлено хьахьоадаь лазар шийна дий тахкар духьа лорашка чакхбала безилга.