Ший лоӏаме кӏалкхетаргах латара Дунен чемпионате котбаьннараш тӏаийцар минспорте
Дунен чемпионате борза майдилгаш йоахаш, белгалбаьнна Хоаной Исмаӏал, Мутаӏаланаькъан Абукар тӏаэцаш бар мехкарча спорта гӏулакхех йолча Министерстве. Грамоташ, ахчан совгӏаташ луш, доккха баркал кхайкадир царна министр волча Белхарой Руслана. Гӏо деш, оагӏув хьаллаьцар котало яьккхарий, цар тренерий «Ади-Ахьмад» клуб хьакхеллача Россе спортацарча латара Федерацен вице-президент волча Харсенаькъан Ӏалихана. Спортсменашта, тренерашта баркал оалаш; каьхаташ, ахчан совгӏаташ хьадайта саг ва из.
Хоаной Исмаӏало борза майдилг яьккхар 79 кг дозал дарашта юкъе. Министро 1 миллион сомах дола сертификат делар цунна, иштта белгалвир цун тренер Гусейнов Зелимхан.
Боккхагӏчар Дунен чемпионате дакъа лоацаш, белгалваьлар из укх шера. Йоккхача яхьашка кхоъ дошо майдилг йоаккхаш белгалваьнна волча Усмананаькъан Ахьмадал котваьлар из.
Мутаӏаланаькъан Абукара а кхаьчар министрагара цхьан миллионах латта сертификат, иштта белгалвир цун тренер Сайтиевгӏар Адам.
Вай къаман спортсмений наькъах дувцаш, министра белгалдир, меценаташа республикерча спорта хӏама тоадара тӏехьа лоархӏаме дакъа лоацилга. «Ади-Ахьмад» клуб хьакхелла волча Россе спортацарча латара Федерацен вице-президента Харсенаькъан Ӏалихана спортсмений, иштта цар тренерий оагӏув хьаллоацаш хиларах; доккха баркал кхайкадир цо. Вай къонача спортсменашта, хам баь баргбоацаш, новкъостал да из.
