ГӀалгӀай мехка дӀахьош ба «Берригача дезалца- музее» яха болам
ГӀалгӀайчен политически Ӏазап лайнарий дагалоаттама мемориале каст-каста дӀахьу «Берригача дезалца - музее» яха, Ӏадатех лоархӀаш бола болам. Из хӀара бетта шоллагӀча кӀира хул, республикан бахархошта а иштта вай хьаьшашта а мах боацаш дӀахьош ба из.
«Укхаза венача сага гургда тайп-тайпара гойтамаш, интерактивни болх, музея дер. Музее вахар - из массайолча хана а хиннад шийна ховшдар дикагӀа дегӀадоаладарца, искусствоца, истори довзарца дувзаденна.
Къам мехкахдаккхарах болча дагалоаттама хьакхелла мемориальни комплекс лоархӀаме моттиг я, из хиларах дагадох вайна цу денца дувзаденна дукха хӀама, иштта вай байнараш дагабоха, царна маьл кхайкабе таро хул цига», - аьлар «Сердало» газетага ГӀалгӀайчен культуран министерствон зарбан болх лелабераша.
