Юрташкара юкъара моттигаш тоаеш латт
ГӀалгӀайчен цхьаццайолча юрташка, юкъара доазош тоадеш латт. 2024 шера вайцига кердаяха лаьрхӀад цхьа ткъаьх цу тайпара нах дукхагӀа тӀалатта моттигаш, яхаш, дийцар «Сердало» газетага ГӀалгӀай Республикан гӀишлон Министерстве.
«Цу дикача балхо таро хулийт юрташкара хьалаш тоаде а хозагӀа хилийта а. Карарча хана гӀишлон балхаш дӀадахьа барт баьб, доал деча моттигашка. Цхьайолча юрташка уж балхаш дӀа а доладаьд.
Масала, Сурхо тӀа «Элитспецстроя» дика болх беш латт, Нови урам тӀа 1800 метр бӀаьха асфальт Ӏобуллаш.
Цул совгӀа, цига сердал а, хоза гӀандаш а, нувхаш чутувса яшкаш а хургья. Цу гӀулакха хьахьожадаьд 10 миллион сом», - йоах хоамо.
Иштта «Сердало» газета хьалхагӀа яздаьдар, МагӀалбикера Шейх Мансура цӀерагӀа урам тоабеш латташ хиларах. Дика тоабергба МагӀалбика кхален Кердача Реданта Бекбузаранаькъан цӀерагӀа урам а. Къаман проекта чудоагӀаш дола балхаш дӀадоладаьд Шолже, Илдарха-ГӀалий тӀа, укхаза юкъара ялх моттиг тоае лерхӀ.
Кхы а йиъ юрта, кастлуш уж балхаш дӀадоладергда. БӀаьстан дӀайхача деношка цу тайпара болх сихагӀа дӀабода.
