Суртанчий музее, «ГӀалгӀайчен исбахьален искусство» яха книжка довзийтаргда
«Из кхетачеа ГӀалгӀайчен культура, Ӏадаташ дезарашта, уж кӀоаргагӀа Ӏомаде ловрашта дукхагӀа эшаш я. Цига хьа мел воагӀаргволча сага йицлургйоацаш из хилийта а хьожаргда тхо. Хьавенача сага совгӀата книжка а лургда», - аьлар «Сердало» газетага ГӀалгӀайчен исбахьален искусствай музея кулгалхочо ТӀумхой Любас.
Укх дукхача шерашка болх беш, Паччахьалкхен исбахьален искусствай музее хьаӀоаяьй мах баь варгвоаца искусствон, биографей, суртий материалаш, уж хетаяь я мехка исбахьален искусство дегӀаахара исторена, цун цӀихезача суртанчашта.
«ГӀалгӀайчен исбахьален искусство» яха книжка, цхьан оагӀонга диллача, дукхача шерашка музее баьча балха чаккхе я, начӀал дола, шоашкара доккха исторен дакъа юкъедихьа нах ба цига къахьийгараш.
Уж геттара чӀоагӀа лоархӀаш а лорадеш а хьакхоачадаьд укх деношка, хӀанз цудухьа уж долаш да музея фондашка. Керттера терко музее тӀаяхийтай къаман суртанчий кхоллама, царна карагӀдаьннад шоай суртий гӀонца, ше морг кхы йоаца гӀалгӀай къаман белгало, цун Ӏадаташ, культура лорае.
