МВД дикагӀа тӀема кийчо яьча эпсарашта совгӀаташ делар
Укх деношка, ГӀалгӀай Республике гӀолла йолча МВД, ГӀалгӀай Республике гӀолла чурча гӀулакхий министра гӀончас, полице полковника Маммаев Багомеда чурча гӀулакхий органий – герз кхоссара даькъе дикагӀа кийчо яьрашта, тӀема кийчонах белгалбаьннарашта совгӀаташ делар, яхаш, дийцар «Сердало» газетага мехка бокъонаш лораераша.
«Коталон ди хиларца дувзаденна, дӀадихьар министерствон болхлошта совгӀаташ далара ди.
Меттахьа герз тоха ховш хиларца, белгалваьлар полице подполковник Дарбазанаькъан Хьусен, полице воккхагӀа вола лейтенант Совтанаькъан Ислам, цар командо яхье кхоалагӀа моттиг яьккхар. Полковника Дарбазанова иштта шоллагӀа моттиг а яьккхар къаьсттача яхье», - йоах хоамо.
Полковника Маммаева дег чура даькъалабийцар цига дакъа лоацаш хинна эпсараш, баркал аьлар дика кийчо яь уж хиларах; дӀахо а, шоай новкъосташта масал гойташ, уж хургболга ше тешаш хилар а белгалдир. ГӀалгӀай Республике гӀолла йолча МВД кулгалхоша, цигарча болхлоша, цу совгӀаташца даькъалабийцар шоай балха новкъостий, шоай балха тӀа цар керда толамаш дахар ловш.
