Теракта юкъе байна болхлой дагалаьцар МВД
15 шу хьалха, Наьсарерча РОВД террористаша оттадаьча доккхача хатара юкъе, вахар хаьдар 25 болхлочун. Уж дагалоацаш кхетаче дӀайихьар МВД. «Сердалога» из хоам бир МВД зарбан болх лелабераша.
2009-ча шера, ахкан тӀехьарча бетта 17-ча дийнахьа Наьсарерча РОВД ковна наӀараш йохаеш, чуийккхар вала лаьрхӀа террорист чувагӀа машин. 400 кг тротил чуйола из эккхийтар зуламхочо милице коа.
«Шоай вахар ца кходеш, наьха моаршо лораеш лаьтта новкъостий тхона цӀаккха бицлургбац», - аьлар мехкарча МВД.
Цу доккхача зулама юкъе, вахар хаьдар 25 болхлочун, 130 саг йоккхий човнаш еш лозавир, царна юкъе бар маьрша нах.
«Цар гойта турпала гӀулакх даиман вайна хьалхашка латтаргда! ЦӀаккха а бицбе йиш ярех бац уж нах», - аьлар МВД болхлоша.
Бейнача болхлой сийна мемориале зизаш дехкар МВД викалаша.
