Наьсар-Кертерча маьждига юхера тӀий тоадаьд
Карарча шера, «Туризм, хьаьша тӀаэцар» яхача ГӏалгӀайчен туризма комитета къаман проектага гӀолла тоаеш латт кхо моттиг- Малсаганаькъан КӀ. цӀерагӀа парк, Ӏабе - Гув, Наьсар-Кертерча маьждига юхера тӀий. Тоае уж кхо моттиг бахархоша шоаш хьахержаяр, йоах, Наьсарен администраце.
Наьсар-Кертера маьждиг тӀадола доазув, административни даькъ тӀа меттел, шахьаре а бахача наха накъадоалаш да, дукха ха яр цунна терко тӀаяхийта еза: маьждига тӀадодаш дола тӀий а тоаде дезаш дар.
Тӏий тоадир, чӀоагӀдир, бетона гӀозараш овттадаь, тӀера дӀахьаьха, цун дехьавоалача сага аттагӀа хургдолаш, дехьа-сехьа хьалаца моттиг а яь.
Наьсарен Кулгалхочо Йовлой Урусхана белгалду шахьара доазон тӀа къаман проекташ кхоачашъяр лоархӀаме долга, дерригача къаман проекташа дӀахьош долча балхашта ше тӀахьожаш хилар.
Бахархоша шоай аргӀагӀа баркал оал, цу даькъ тӀа иштта теркам лоаттабеш хилара», - аьлар ювцача моттиге.
