«Цу даькъ тӀа кийчде дезаш да Наьсар оалаш долча хин йистера доазув. Укхаза велосипедаш хехкара бола никъ тоабеш латт, иштта гонахьа баьццара гаьнаш йогӀаргья. Ювцача мотте бахача наха чӀоагӀа лоархӀаме да из оагӀув тоаеш хилар, хӀана аьлча хӀанзалца чӀоагӀа воча хьале лаьттай из», — аьлар шахьара керттерча архитектора ЦӀечой Басира. Белгалдаккха дезаш да, Наьсаре 2022 шера денз, «Боахам, шахьара хьалаш» яхача къаман проектах хьаеш латт кхоъ салоӀа моттиг, иштта гӀашлой наькъаш тоадеш латт, дӀадахача шера бахархоша кхадж тассарца хьахаржа хиннача моттиге.