Наьсаре кхетаче хилар КЧС, ОПБ болхлой
Наьсарен администраце, шахьара кулгалхочун гӀончас Котанаькъан А. кулгал деш, дӀайихьар, Наьсарен-Шахьара чоалханерча хьалах, цӀера кхерамзлен Ӏалашо ярах йолча комиссе аргӀанара кхетаче, яхаш, дийцар доал деча даькъ тӀара зарбан болх лелабераша.
Цига дакъа лоацаш хилар администраце граждански оборона, чоалханерча хьала отдела кулгалхо Янданаькъан З.; Наьсаре, Наьсарен кхале гӀолла йолча ОНДПР кулгалхо Къоастой М.; иштта администраце кхыйолча отделий, Наьсарен административни куран кулгалхой.
Гулбеннараша дийцар, бе безача балхах, иштта цӀи ялара кхерамзлен Ӏалашо е еза ха тӀакхоачаш латташ хиларах. БӀаьсти хьаяларца; наха, бешамашка кулг тохаш, йокъаенна йоархӀаш, баьцаш летаеш хиларца; цӀи ялара кхерамзлен болх тӀакхеташ хилар а теркама юкъеийцар гулбеннараша.
Иштта цу кхетаче техкар, бӀаьсти Ӏаьржа хиш доагӀаш хуле, де деза балхаш. 2024 шера цу гӀулакха яь кийчо а белгалйир. Цул совгӀа, еррига цӀи ялара кхерамзлен лаьрхӀа йола таронаш, Наьсарен-Шахьара доазон тӀа, хила езача боарам тӀа кийча хилийта, аьнна, хьоахадир.
«ВӀаштӀара даьча цӀеношка бахача наьха, иштта нах кхотабенна бахача моттигашка, таро йоацаш бола нах бахача, социальни кхерам болча моттигашка бахача нахага хоам бара кийчо е, из дош даим теркама юкъе лоаттаде; цӀаьхха, хоам бе безаш хуле а», - аьлар гулбеннарашка.
Шоаш мел дийца дешаш ханнахьа кхоачашдарах бехктокхаме бараш белгалбир.
