Гӏалгӏай къаман дагалоаттама, сийлен Мемориал тоаеш ба Наьсаре
Дагалоаттама, сийлен Мемориал тоаеш болх ба, мехка дӏаболабаь. Карарча хана кхуркхолг меттабоалабеш боахк цига, укх деношка тӏера куц хувцаш бола болх дӏаболабергба. Иштта Мемориале чудоагӏаш дола сийленгаш, кхыйола моттигаш меттайоалаергья. «Сердалога» из хоам бера мехкарча Паччахьалкхера.
«Карарча хана «Акхача дивизена», Брестски крепосте фашисташта духьале яьча Барханой Уматгирена оттадаьча сийленгашцара телха моттигаш тоаеш ба болхлой.
«Гӏалгӏайче Россех дӏакхетар» белгалдеш тоаяьча моттигаца, иштта Советски Союза Тупалий, цӏихезача наьха цӏераш дӏаязъяь латтача улга тӏара басараш бесаздаларах, хувцам беш болх дӏабахьа беза.
Моллагӏча хаоттама дикагӏа духьалъотталуча хӏаманца тоаергья уж моттигаш. Лакха тӏахьожам лоаттабеш дӏахьош ба болх, деррига а юххьанца йиллача хана кийча хила дезаш да», - дийцар «Сердалога».
Вай къаман истори ураотташ латтача къонача тӏехьенна довзийтара тӏехьа лоархӏаме моттиг я из. Даьхен истори книжкашка гӏолла ӏомадарал совгӏа, цига хьабаьхка довза аьттув зӏамагӏчар. Туристаш, мехка ухаш бола хьаьший тӏалатташ йола моттиг я ювцар. Цунга хьежжа, лакхача боараме тоаяь, бӏарг тӏаотташ хила еза из.
