Хила ваха хинна кӏаьнк лохаш къахьийгараш белгалбир Наьсарен кхале
Хиво ӏовихьа хинна бархӏ шу даьнна Дербичанаькъан Хизар лохаш къахьийгараш белгалбеш кхетаче дӏайихьар Наьсарен кхален администраце. Цун кулгалхочун декхараш кхоачашдеш волча Исмейланаькъан Темарлана Лоархӏаме грамоташ луш белгалбир цу хана, ди-бийса ца къоастадеш, къахьегаш хинна полице болхлой, гӏо деш хиннараш.
«Дийца ца валлал доккха хиннача цу халахетаро вӏашкаэзар мехкара адам, цхьа дезал санна. Ший дегӏа уйла ца еш, дийнахьа-бус гӏо де, декхараш кхоачашде оттар мах баь варгвоацаш да, вай къаман нах мел барт, бувзам болаш, вӏаший тӏаотта кийча болаш ба бӏаргадайра дерригача дуненна цу деношка», - дийцар «Сердало» газетага Исмейланаькъан Темарлана.
Кӏаьнк лохаш къахьегарал совгӏа, из операци дӏахьош хиннача моттиге тӏахьожаш, болх кега ца болийташ хиларах, доккха баркал кхайкадир царна. Дезалхо вайнача нахах дог лазаш ураоттарах, Лоархӏамеча грамоташца белгалвир полице майор Муцолганаькъан Харон, Албохчанаькъан Мухьмад, полице воккхагӏа вола лейтенант Кхоартой ӏаьла, полице лейтенант Хамхой Асхьаб, гӏо деш хинна Муцолганаькъан Хайрудин.
