Гӏажарий-Юртарча культуран Цӏагӏа гӏалгӏай метта хетаяь кхетаче дӏайихьар
Гӏалгӏай метта, литературанна хетаяь яхь дӏахьош хилар, Гӏажарий-Юртарча культуран Цӏагӏа. Кхувш латтача къонача тӏехьенна юкъе наьна мотт боаржабеш, цун хӏама лакхача лерхӏамца хьаллоацаш дӏадахьа дезилга белгалдеш, кхетаче яр из.
«Ловзара юкъе дакъа лаьцар туризмах, доал дарах йолча Халкъашта юкъерча колледжа студенташа. Къонабараша гойтар къаман мотт шоай дегашта боча болга, цун хӏама лорадар шоашта керттерча декхарех хетилга.
«Дзурдзуки», «Вӏовнашке» яха ши тоаба яр меттацара шоай кхетама хьал малагӏча боараме латт гойташ хиннараш. Ловзар массавар тӏаозаш, чӏоагӏа дог айдеш хилар. Гӏалгӏай мотт шоай син мотт болга, цунга хьежжа из лорабар массане юкъара декхар долга белгалдеш бар къонабараш», - дийцар «Сердалога» цу моттигера. Котало «Вӏовнашке» яхача тоабанга кхаьчар.
Шоллагӏча тоабал цхьа балл дукхагӏа хилар цар. Гуш дар, шинна тоабан доакъашхой дикка кийчо яь болга. Кагирхой шоай къаман хӏама, даьшкара хьадоагӏа гӏулакхаш лакха лархӏар хьаллоацаш болга хьагойтар цу кхетачено.
Белгалде деза, иштта дола ловзараш къонабарашта юкъе доаржадар, геттара боккха пайда беш, лоархӏаме долга. Наьна мотт ноахалашта юкъера бувзам чӏоагӏбеш бола оагӏув ба. Тахан къаман меттаца вай дӏаоалар, хестадер цхьаккха а кхыча меттаца иштта хоза, кӏоарга оалалургдац вайга.
Цӏаккха а дицде йиш яц, наьна мотт лорабар, цун хӏама хьаллацар лоархӏаме дола, вайга массанега кхоача декхар долга.
