Гӏажарий-Юртара «Селаӏад» яха берий беш тоаеш, боахк болхлой
Гӏажарий-Юртара «Селаӏад» яха берий беш тоаеш бола болх дӏаболабаь, къахьегаш боахк тахан болхлой. 1967-ча шера хьалъяь я из гӏишло, бакъда цу хана денз цкъа мара, дикка кулг тохаш, тоаяь хиннаяц из. Дукха шераш хьалха хьалъяь гӏишло цӏенхашта тоае езача, деррига хувца дезача ден тӏа этта дукха ха яр, кхерамзлен хьалага диллача а ма хулла сихагӏа меттайоалае езарех яр из.
140 бера моттигаш луш хургья керда берий беш, болхлой даггара къахьегаш боахк цига. Минстроя тӏахьожам беш, «Дезал» яхача къаман проектага гӏолла дӏахьош ба из болх. 36 миллион совгӏа рузкъа да федеральни ганзера цу гӏулакха хьахьожадаьр. «ООО «ОРГРЕМСТРОЙ» яха гӏишлон балхаш леладу тоаба я болх дӏатӏаийцар. Карарча хана тхов хийца баьннаб болхлой, чухьнахьа йовкъаш йохкаш, кӏалхара кӏийле тоаеш бола болх дӏаболабаьб цар. Укх деношка дӏадоладергда инженерни гӏирсаш чудахкара балхаш а; тока саьргаш, йӏовхала, хин турбаш я хувца езаш.
Дешара шу доладалале, кийча хила езаш я берий беш. 1,5 шергара 7 шерга кхаччалца дола бераш хургда цига. Таханарча хано дӏадеххача тайпара тоаяь йолча цу моттиге берашта мел эшар хургда», - дийцар «Сердалога» гӏишлошъяра Министерстве.
Кхетаченашта, спорта хетаяь залаш, лорий кабинет, иштта кхыдараш хургда цига. Белгалде деза, кхо шу хьалха цу доазон тӏа, 80 бера моттигаш луш, вӏаштӏаръяь гӏишло хьалъяь хиннилга. Ахкан тӏехьарча беттага кхачале, деррига балхаш йистедаьнна, зӏамига хьаьший тӏаэца кийча хила безаш ба цига. Цу юртарча наха доккха совгӏат хиннад цох ала мегаргдолаш, болх ба из.
