Кердача Реданте 720 моттиг йола керда ишкол хьалъеш я
Гӏалгӏайчен Магӏалбика кхален Кердача Реданте 720 дешархочоа лаьрхӏа керда ишкол хьалъеш латт. Болх йиллача ханал хьалха чакхбоалаш ба. Цу юрта дешара моттигаш ца тоъаш хилар юстардаккха таро лу из хьалъяро. №24 йола ишкол къаьна хиларах дӏа а къайла, еррига хало тӏалаттар №5 йолча ишкола. 500 бера лаьрхӏа йолча цу ишколе дешаш дар 1,2 эзар бер. Цох цкъа дийца ӏийнадац бахархоша шоайла вӏашагӏкхийттача, иштта кулгалхошца.
«2023 шера из кхоачашдара къахьега болабелар. Дӏахо Кердача Реданте, Пхьилекъонгий-Юрта кхоъ ишкол, Гӏажарий-Юрта, Галашка ишколаш хьалъяра хаттар эттар федеральни боараме. Гӏалгӏайчера сенатор хьожаваьча Илезанаькъан Михаила тӏадиллар цу даькъ тӏа де йиш яр Федераце Совете чакхдаккхар. Цун Председатела Матвиенко Валентина Ивановнас хьаллацарах, йиъ гӏишло хьалъяра программа юкъеяьлар. Керда ишколаш хьалъеш я, «Деррига дикагӏдар берашта» яхача къаман проекта чуйоагӏаш. Из могаю Россе Президента. Юкъара дӏалаьрхӏача йиъ моттиг хьалъяро 1,6 эзар дешархо тӏаэцаргва. Тахан Кердача Реданте болх дика дӏахьош ба. Гӏишлошъяра Министерствонна тӏадиллар укх шера цу балха цхьа дакъа чакхдаккхара ахча хьалхагӏа хьадалар. Нагахьа санна сихагӏа из дӏабахьа таро хуле, иштта дӏахьоргба», - язду ший телеграм-канала тӏа Гӏалгӏайчен кулгалхочо Келаматанаькъан Махьмуд-Ӏаьлас.
Республикан кулгалхочо керттерчарех лоархӏаш я Кердача Реданте хьалъеш йола ишкол - из сиха а тешаме а е еза. Сихагӏа хьалъеш хилар ӏаткъаш хила йиш яц дикала. Гӏалгӏайчен ӏаьдало, моттигерча бахархошта из лоархӏаме хилар кхета а деш, ший тӏахьожама юкъеийцад деррига гӏишлошъяра балхаш.
Мехкадас баркал аьлар Федераце Совета Председатела Матвиенко Валентинайна, республикан проекташ хьаллацарах. Хӏанз вайцига керда йиъ дешара моттиг хьалъеш я.
Тӏехьарча хана даь даьнна балхаш дукха да. 2019 шера денз, Гӏалгӏайче керда хьалъяьй 100 дешара моттиг - 49 ишкол, 51 берий беш, из бахьан долаш 8 эзар сага балха моттигаш хилар. Республика тешшаме дӏахойодаш я, цу вахара лоархӏамеча наькъ тӏа.
