Кхетаченна кулгал деш хиннар вар Боканаькъан ИбрахIим. «Керттерчарех дола хаттараш доашхаш, дакъа лаьцараш бар вице-спикер йола Хьаьшанаькъан Аза; къаман собране депутаташ, энергетикахи коммунальни боахамахи долча гIулакха министр Лоалахой Ахьмад, цу министра гIонча ГIайтакханаькъан Тимур, «Ингушрегионводоконал» ГУПа кулгалхо Курсайнаькъан Муса», — йоах тхога бенача хоамо. Мехка паччахьалкхено юкъейоалаяьча законопроектех дийцар вIашагIкхетаре. Хин гIулакхаца дувзаденнача маьхех, цох мукъабоалийтарех, иштта кхыдарех а дувцаш дIайихьар кхетаче. Хьоахадир мах бала безарий фу дала деза, бала цабезараш малаш ба белгалдоаккхаш, бахархой спискаш оттае еза, аьнна. Энергетикахи коммунальни боахамахи долча гIулакхий министр волча Лоалахой Ахьмада белгалдир, республикера хин турбаш геттара тишъенна, хувца езача кхаьча дукха ха я, аьнна.

Законопроекте юкъедоаладаьраш кхоачашдаро из гIулакх дикка аттачахьа дерзадергда. Эггара чIоагIагIа хин гIулакх тоаде дезача моттигех я Пхьилекъонгий- Юрти МагIалбики аьлар кхетаче. Хицара гIулакх МУПера ГУПашка дIадала деза, аьнна, соцам бир цига. ЦаI йолча мах оттабара политиках дIабахьа беза из болх, аьлар Курсайнаькъан Мусас. «Цхьаццадола хаттараш, вIалла тIера тIахьожам дIа ца боаккхаш, лоаттаду депутаташа.

Царех да республикера хин гIулакх. Тхо хьожаш хургда, законопроекташ мишта кхоачашъю», — аьлар Боканаькъан ИбрахIима.