Моттигерча Паччахьалкхено дийцар, лорий балха нийслуш долча кхааш ийдарах
Республикан Паччахьлкхен, Гӏалгӏайчен унахцӏенон Министерствон болхлоша, лорий урхаллен керттерча лораша дакъа лоацаш, семинар-кхетаче дӏайихьар, цун керте латтар Гӏалгӏай Республикан Паччахьалкхен Председатела гӏонча Антонов Игорь. Цига дийца дош дар унахцӏенон балха даькъ тӏа кхааш ийдеш хилар. Семинара-кхетачен балха даькъ тӏа дакъа лоацаш хилар Гӏалгӏай Республикан федеральни антимонопольни гӏулакха Урхаллен кулгалхо Тоачанаькъан Батыр.
Цо хоам бир гулбеннарашка, ше кулгал деча моттиго дӏабихьача тӏахьожама балхах. Цо яхачох, тӏеххьарча шерашка гучайоалаш латт дукха бокъонаш телхаеш йола моттигаш, лорий гӏирсаш эцача даькъ тӏа нийслуш йола.
«Дукхагӏча даькъе законо дӏадехаш дар юкъе ца доаладеш, контракташ увттаяра болх белгалбоалаш ба. Тха болхлой терко тӏайохийташ ба из санна дола хьал юкъедаргдоацаш, цо новкъарло ю бюджетера хьалаш пайда баргболаш леладара.
Цул совгӏа, укх шера денз балха юкъедаьккхад «Антикартель» ГИС яха балха хьал, цо ше мах оттабу электронни тӏаьргий даькъ тӏа дӏахьош болча балха. Цу хьалага гӏолла ховш хул компанеша из болх мишта дӏахьу, цу юкъе керда доакъашхо воалий, малагӏа маьхаш хувцаденнад. Цу тайпара балха оагӏув лелаеш хуле, из хоам хьакхоач тхога, цул тӏехьагӏа тха говзанчаш массехк пайда баргболча оагӏорахьа из болх вӏашагӏболла безаш хул», - аьлар Тоачанаькъан Батыра.
Ший оагӏорахьа Антонов Игора хьалхадаьккхар, тӏахьожама болхлой шоай белггала дола хаттараш хилар унахцӏенон, дешара даькъ тӏа къахьегачарга, уж ба керттера лораш, ишколай кулгалхой, царех цхьабарашкара хӏанз лоткъам эцаш ба. Цо тӏахьийхар берригаш шоай балха моттигашка бехктокхаме хилара.
