Къаман проекташка гӏолла, болх дӏабахьарах дийцар мехкарча паччахьалкхено
Министрий кабинета доакъашхой, тайп-тайпарча моттигашкара хьакимаш болаш, премьер-министра Сластенин Владимира кулгал деш, кхетаче хилар вай мехка. Цига дийцар къаман проекташка гӏолла болх дӏабахьарах. Къаьстта терко йир кхетаче эггара хьалхарча оагӏонца йоаржае езача проекташта. Цох лаьца доклад йир цига проектни оагӏон кулгалхочун гӏонча волча Ваделанаькъан Ӏалихана.
«Маьцхали бетта 17-ча денга диллача, къаман проекташта лаьрхӏа мехка хьахьожадаьр 5 млрд 733,8 млн сом рузкъа да. Контрактировани - 94,8%, кассови болх- 60%. Россе Минфине белгалдечох, федеральни оагӏоно рузкъа лоаттадеш йолча ворхӏ проекташта юкъерча пхе проектацара болх российски юкъерча боарамал лакхагӏа латт тахан. Дикка гаьнабаьннаб ала йиш я «Дика, пайдане экономика» яхача къаман проектацара болх- 100%. «Дӏаьха, кадай вахар» яхача проектацара болх тахан 70,3% - тӏа латт, «Дезал» яха проект – 63, 7%, «Экологи» - 61,8%, «Вахарера гӏулакхаш» - 55,2%.
Цу ерригача проекташцара болх тахан российски юкъерча боарамал дикка лакхагӏа латт вай мехка. «Кагирхойи бераши» яхача проекта кассови болх – 54,1% , Россе гӏоллара юкъара боарам - 56,1%», - дийцар «Сердалога» мехкарча паччахьалкхено.
Сластенин Владимира белгалдир цу программашцара болх иштта лакхача боарам тӏа хилийта безилга дӏахо а,хӏаьта юкъерча российски боарамга кхоачаш йоацача проектий гӏулакха дикка терко, тӏахьожам бе беза, аьнна, теркалдир. Министрий кабинета кулгалхочо тӏадиллар болх боаггӏача боараме, юххьанца къоастаяьча хана, чакхбаккхарга хьожаш хила, аьнна.
