Инаркъе керда спортивни майда хургья
Гӏалгӏайчен Магӏалбика кхале дегӏайоалаеш я спортивни майда. Цига хьалъеш латт керда физкультуран лаьрхӏа майда. Из чуйоагӏаш я еррига спорта программаш кхоачашъяра йолча федеральни проекта.
«Таханарча денга кхоачаш кхоачашдаьд 80% дӏадахьа лаьрхӏа балхаш. Карарча хана сердалон бӏоагӏий оттадеш да, асфальт ӏобуллаш латт. Из проект кхоачашъяро цу юрта бахача наха укх заман хьалаш хьакхолла таро лургья, цар физически культуран, спорта занятеш дӏахьоргья, дика салоӏама ха вӏашагӏйоллаш», - аьлар «Сердало» газетага Магӏалбика кхален администраце.
Керда дешара майда Инаркъе баха нах тӏаозаш хургья. Из хьаелларо моттигера спортивни хьал хувцаргда, хӏара сага таро хургья ара цӏенача фега физкультура дӏаяхьа, шоай могашал тоае. Керттера маӏан - кхувш йоагӏа тӏехье цу юкъеяккхар; бераш телефон тӏара, экрана тӏара хьадахар; спорт, унахцӏена вахар леладар, укх заман дика хьал лоархӏаш долга кагирхошта дӏахайтар.
