«Кердача ишколе берашта эшаш мел дола хьалаш долаш да: сийрда, йоккха кабинеташ, библиотека, урок йоацача хана салаӀа моттиг. Ишкола гонахьарча доазон тӀа карт яьй, из гобаьккха чудерзадаьд, массанахьа салаӀа гӀандаш оттадаьд, хӀанз гонахьа гаьнаш а дӀайогӀа лерхӀ. Дешара урхаллен доазон тӀа цӀера кхерамзлен 200 куб.м. чуйода пед оттабаьб, блоках хьалъяьй котельни», - аьлар «Сердало» газетага МагӀалбика кхален администраце кулгалхочо Къоастой Ӏаддал-Хьамида, ше тахан гӀишлон балхаш мичахьа кхаьчад хьожаш волча хана.

Инаркъе хьалъяьча ишколо хьагойт «Дешар» яха проект хилар бахьан долаш, мехка берригача бахархошта дикача дешарца Ӏалашо ярал совгӀа, цо иштта юрташкара вахара хьал а дегӀадоаладеш хилар. Керда дешара моттиг болх бе юкъеяларо берашта дика кхетам лургба, бахархошта дика новкъостал дергда кхувш йоагӀа тӀехье дегӀайоалае, юкъарча вахаре дакъа лаца.