Сурхо тӀара ишкол тоайир
25.08.2023 11:48
Укх шера боккха болх дӀахьош, тоае оттаяьча 16 ишколанна юкъе яр Сурхо тӀара № 3 йола ишкол. Хьалха хинначун тара йоацаш, йовзаргйоацаш тоаяь латт из, бераш тӀаэца кийча йолаш.
«Болх малагӀча боараме дӀабихьаб тахка ваха хилар гӀишлой балхах йолча министерствон кулгал ду Балахой М. Массайолча моттигашка хьожаш чакхваьлча, баьча балха раьза хилар из», — йоах тхогарча хоамо.
ДӀадахача шера бӀаьсти дӀаболабир из болх. Деррига кхоачашдаь даьннад, ишкол ший дешархошка хьежаш я. Керда гӀандаш, истолаш, ишкапаш, улгаш денад цига. Цу дерригне хам беш, деша аьттув хилба вай берий!
