ЖӀакашца хьоашал леладу ГӀажарий-Юртарча бахархоша
ГӀажарий-Юртарча дешархошта юкъе доаржаду, пайда болаш ха дӀаяхьар. Боккхача тӀема юкъе Котало яьккха 80 шу дизара хетаяь жӀакашцара кхетаче дӀайихьар № 4 йолча ишколе. Из хоам «Сердалога» бир кхален администраце.
«Сагага уйла яйташ, кхетам сомабоаккхаш дола ловзар дезарашта берий-кагирхой жӀакай спорта ишколе тренер волча Темиркъенаькъан Саламхана дешархошта хьалхадаьхар цу ловзара юкъе лораде дезараш, керттердараш. Берашта дайзар квадратаца, оппозицеца, рокировкаца, жӀакай нотацеца дувзаденнараш», - дийцар тха газетага.
«Шахматаш, духхьал ловзар хинна ца Ӏеш, вахара бӀарча ишкол я. ХӀара минот геттара чӀоагӀа уйла еш дӀаяхьа еза ловзархочо, хӀаьта тоабан юкъе ловзаш вале, цо лаьрхӀачунга хьежжа хул ерригача тоабан хьал. Цудухьа, бӀарччача тоабан уйла еш, дӀадахьа дезаш ловзар да из», - дийцар Саламхана.
Ишколанна кулгал деча ГӀулой Анжелас белгалдир, жӀакаша берий кхетам чӀоагӀбара тӀехьа дикка гӀо делга, кхувш латтарашта къаьстта из ловзар пайда беш долга.
