ГӀалгӀай фольклора цӀай дӀадихьар ГӀажарий-Юрта
«Дийндар - бегашта зоахалол дувцар» яхача гӀалгӀай фольклора цӀайна юкъе дакъа лоацаш хилар бахархой. Из вӀашагӀделладар Боканаькъан Ӏийсас кулгал деш йолча Франко - ГӀалгӀай тохкама моттиго. Из хоам «Сердалога» бир Шолжа-Шахьарерча мэре.
«Кхыча мехкашка бахаш болча вай къаман наха Ӏадаташ, оамалаш дӀайовзийтара тӀехьа вӀашагӀъелла кхетаче яр из. Цига дакъа лоацаш бар йоазонхой Союза доакъашхо БӀарахой Ӏаддал-Хьамид, гӀалгӀай метта хьехархо Хоаной Ӏийса, байтанча Балайнаькъан Хьасан», - дийцар тха газетага. Вай къаман Ӏадатех хила деззача тайпара устагӀан корта, дими, накха, хьовла, чӀаьпилгаш оттадаь, кийчдаьдар истолаш.
Юртарча культуран цӀагӀарча бераша, МагӀалбикерча № 5 йолча ишколера арабаьннараша, доал дарахи туризмахи йолча къамашта юкъерча колледжа студенташа хьоалчагӀа дӀадахьара гӀулакхаш гойтар гулбеннарашта. Цу юкъе дар нув-ферта тассар, мотт бастар, хи тӀа яккхар, иштта зоахалол дувцара гӀулакх а.
Цига баьхка бар къаман артистка йола Охценаькъан Роза, культуран цӀагӀара доакъашхой Ӏахилганаькъан Хадиза, ЭльгакаевгӀар Седа.
