«Укхаза венача хӀара сага го йиш я хоза, йӀаьхий, ший тайпара йола ГӀалгӀайче, цунна боаггӀача беса мах оттабе йиш я, шийна хьалхашка го йиш я культуран, Ӏадатий, тароний дуне», - йоах хоамо.

Цу лоархӀамеча кхетаче дакъа лоацаш хилар республикан викалаш, шоашта керте Келаматанаькъан Махьмуд-Ӏаьла а волаш, иштта цига ба РФ Паччахьалкхен, Федераце Совета доакъашхой, сий дола хьаьший, республикан боахамий, гӀулакхий викалаш, бизнесменаш, кхоллама болхлой, журналисташ, кхыбола нах. Кхетачен даькъ тӀа дӀахьоргда «ГӀалгӀайче- вӀовний мехка бода никъ» яха герга истол, цига дакъа лоацаш хургба цӀихеза нах-Ӏилманхой, историкаш, Ӏаьдала органашка болх беш бола нах, шоаш хӀама хьадеш бола нах.

Укхаза моллагӀча сага таро хургья говзанч-хьехамга хьежачул тӀехьагӀа, хореографе, кулгаговзала даькъ тӀа шийна фу карагӀдоал хьажа. Иштта республикан артисташа шоай начӀал гойтаргда. Келаматанаькъан Махьмуд-Ӏаьлас яхачох, из деррига а Россе дукхача тайпара йолча культуран тӀехьале хьаллоацаш хилар да, цо таро лу Российски Федераце цаӀ долча российски халкъа культуран таронаш гойта.

«Гойтаме баьхкарашта дикагӀа йовзаргья ГӀалгӀайче, цун культуран тӀехьале, экономика даькъ тӀа цунна карагӀдаьннар, туристически оагӀонаш; йиш хургья тайп-тайпарча даарий чам баккха, хьаьша-да тӀаэцар миштад хьажа, иштта ха йиш хургья ГӀалгӀайчено селлара дукхача туристий терко тӀаозаш хилара бахьан малагӀа да ха», - аьлар Макшарипа Махьмуд-Ӏаьлас.

Из доацаш а, цу йоккхача кхетаче ГӀалгӀайчен исторега, дешара лекцешка ладувгӀа йиш хургья.