«УнахцӀенон гулакхахи технологехи йолча Ставрополерча техникума филиале кагирхошца кхетаче дӀайихьар шахьарерча администраце болхло волча Ведажанаькъан Идриса, АНК секретарь волча Галай Илеза. Кагирхошка дийцар, тахан массане цхьана терроризма, наркоманена, экстремизма духьала лоаттабе безача къовсамах», — йоах тхогарча хоамо. Цу харцача наькъ тӀа баьннача наха шоай вахар толхадарах, наха юкъе доккха зуламаш доаржадарах дийцар къонабарашка. Интернете гӀолла, наркотикаш Ӏоехкаш, атта ахча даккха йиш йолаш да шо, яхаш, кагирхой тувлабеш, воча хӀаманна тӀахьехаш багӀача нахага ладувгӀа, царца цхьаккха тайпара бувзам лелабе йиш йоацилга хьалхадаьккхар студенташта. Иштта дола хӀама шийна хоаделча, хье ца луш, Ӏалаьмате чехка Ӏаьдала болхлошка хоам бе безилгах дийцар.