Шолжа кхале Гӏурбан цӏай дезде гулбелар боккхийбараш, бераш
Гӏажарий-Юрта Гӏурбан цӏайна хетаяь йоккха кхетаче хилар. Юртахой, бераш гулденна; массане дог ураэтта моттиг хилар цох.
«Дин ӏадатах латтача тайпара Къорӏан аяташ дешаш дӏайолайир из лоархӏаме кхетаче. Дӏахо спорта яхьаш, викторинаш, берашта лаьрхӏа ловзараш, иштта кхыдараш дар цига», - дийцар «Сердалога» Шолжа кхален РДК кулгал деча Матенаькъан ӏайшета.
Шолжа кхален культуран Цӏен болхлоша чӏоагӏа кийчо яьяр бусалба наха чӏоагӏа лоархӏаме дола из цӏай хоза, массане дог гӏоздоалаш дӏахьоргдолаш. ДК таханарча ханага хьежжа йолча, моллагӏча моттиге боккха болам дӏабахьа аьттув луча автоклубага гӏолла вӏаштӏехьадаьлар из деррига.
Цӏай дезде гулбеннарашта лаьрхӏа мах бала ца безаш, тайп-тайпара даараш дар цига. Боккха яй бизза чаме плов даьдар, иштта тӏамала дӏайха, хоза чай дар. Цӏенача лоаман хих дахчах цӏи йийза кийчдаь чай, дувцилга доацаш, ший тайпара дар. Шолжа кхален культуран цӏено енача йоккхача самовара чу кийчдир чай.
Доккха баркал оалаш бар царна гулбенна хиннараш. Боккъал башха, боккхийбарий, берий дог хьоасташ; юкъера барт, безам чӏоагӏбеш йола кхетаче хилар цох.
