Шолжа-Шахьарерча РДК хоржамий кхоалагӏа ди, самовар оттаяь чай молаш, халхар деш дӏахьош бар
Паччахьалкхен Думан, Халкъа Гуллама хоржамий кхоалагӏа ди массане дог ураоттадеш дӏахьош бар № 818 йолча хоржамий доазон тӏа. Шолжа кхален культуран Цӏагӏа бӏарчча цӏай доаржадир.
Даькъастен къамашта юкъе лакха лоархӏаш дола хьаьша тӏаэцар мишта хила деза дӏахьокхаш бар цу моттиге. Дӏа-хьа хьежача берригаш дог айденна, гӏозбаьнна болга теркалдеш дар. Дӏачувоаллача хьаьшашка хозача дешашца моаршал хоатташ, уж тӏаэцаш латташ вай къаман дувхарца кийчдаь бераш дар. Культуран Цӏен болхлоша зӏамагӏбарашта лаьрхӏа мерза маькх, конфеташ, иштта кхыдола даараш тӏадола истол оттадаьдар, дахча чудилла кӏедж йоахаш латташ самовар а яр цига. «Сердалога» из хоам бера РДК кулгал деча Матенаькъан Ӏайшетагара.
Дукха адам дар цига бӏарччача дийнахьа тӏалаьттар. Хоржамий болх мишта дӏабодаш ба хьажа вена хилар мехкарча Паччахьалкхен кулгалхочун хьалхара гӏонча Фурсов Олег, цунца вар Шолжа кхален администрацена хьалха латта Татенаькъан Ӏийса. Цу моттигера болх боаггӏача боараме, цхьаккха кхоачамбоацараш юкъе доацаш дӏабодаш хилара раьза хинна, хоржама комиссен баркал аьнна, бахар хьакимаш.
Цу дийнахьа цига баьхкача лоархӏамеча хьаьшашта юкъе бар мехкарча Избиркома доакъашхо, «Цаӏ йолча Россена» юкъера Дикажанаькъан Мухарбик, Халкъа Гуллама депутат хила ловш вола Малсаганаькъан Ибрахӏим, Шолжа кхален депутатий Совета хьалха латта Йовлой Мухьмад, цун гӏонча Ганенаькъан Мухьаммад, иштта цу моттига тӏахьожам лоаттабу Долакханаькъан Мухьмад, кхален администраце кулгалхочун гӏонча Цӏечой Беслан, Гӏажарий-Юртарча администрацена хьалха латта Чакинаькъан Осман, иштта кхыбараш а.
Шолжа кхален культуран Цӏагӏара кхоллама тоабаш а яр цига, шоай начӏал гойташ. Шолжа-Шахьарера хоржамаш берригаш раьза болаш, массане дог айденна, боаггӏача боараме дӏадахар ала йиш йолаш да тахан.
