Цӏай-Лоам тӏа яьнна цӏи йоаеш я Гӏалгӏайчен ӏалама Министерство
Селхан денз, Жӏайрахьа кхален Цӏай-лоам тӏа лотаенна, йоагаш я йокъаенна йоархӏаш. Из дӏайоаяра халонаш ювзаенна я лоам тӏа вала хала хиларца а, иштта мух хьекхаш хиларца а. Цул совгӏа, гӏулакх довзачар яхачох, кӏалхарваккхара тоабан доакъашхошта из хьал кхераме да.
Цига цӏи йоаеш къахьегаш я Гӏалгӏай Республикан ӏалама Министерствон 20 техника, иштта 150 саг, яхаш, дийцар «Сердало» газетага цу боахаме.
ӏалама Министерствон тоабанна чубоагӏаш ба Шолжен, Наьсарен хьун цӏераш йоаеча моттигий болхлой;, беррига чарахьаш, царна керте ва министр Мизенаькъан Микаил. Цар массане а шоашта могар ду, хьун даькъ тӏа цӏи дӏатӏа ца ялийта гӏерташ.
Карарча хана говзанчаш гонахьара лаьтта оахаш ба хьун даькъ тӏа, цӏи дӏа-юха яржаргйоацаш. Хӏанз уж ба цу моттиге цӏи дӏайоаяьча доазонга, хьун даькъага хьожаш», - аьлар Гӏалгӏайчен ӏалам лорадераша.
