Мехкарча УПЧ ЖКХ дувзаденнараш дашхара тӏехьа бахархой тӏаийбу ди дӏадихьар
ЖКХ дувзаденнараш дашхара тӏехьа, бахархой тӏаийбу ди дӏахьош хилар мехкарча УПЧ. Из хоам «Сердалога» бера цу моттигера.
«Кхетаче дакъа лоацаш хилар мехкара сага бокъонех вола викал Цӏечой Ибрахӏим, «Хин гӏулакхех вола мехкара Цаӏ вола оператор» ГУПа кулгалхочун гӏонча Кӏориганаькъан Бадрудин, «Къилбаседа Кавказа Россетий» ПАО - «Ингушэнерго» филиала керттерча инженера гӏонча Осканаькъан Ислам, ООО «Газпром межрегионгаз Наьсаре» яхача оагӏон кулгалхо Лаьнанаькъан Амир, иштта мехкарча ЖКХ тӏахьожам лоаттабеча оагӏон кулгалхо Гӏогӏанаькъан Хьусен», - йоах тхога бенача хоамо.
Газаца, хица, токаца дувзаденнараш хетташ бар хьатӏаиха нах. ӏаьдала бокъонца хила деззача тайпара деррига хьалхадоаккхаш, тохкаш болх дӏабихьар хьакимаша, хӏаьта геттара чоалханедараш тӏа дӏахо дикка къахьегаргдолаш соцам бир.
Белгалде деза, иштта йола кхетаченаш дӏакхахьар тахан лоархӏаме долга, хӏана аьлча бахархой аьттув боалл моллагӏа шоашта къувлаш дола хӏама хьакимашка гӏолла хьатахка, цхьа йист яккха. Наьха бокъонаш лораяр керте латт ишттача кхетачен.
