Россе сийленна хетаергья йоккха кхетаче
Ахка чакхдоалаш дӀахьоргья «Юкъарло» аьнна йоккха кхетаче, из вӀашагӀйоллаш я Россе хӀарман палата. Цу дикача гӀулакха керттера тема – «Россе доккхал: тӀехьале, дукхача шерашка денз дола Ӏадаташ лорадар». Из хоам «Сердало» газетага бир ГӀалгӀай Республикан Кулгалхочун зарбан болх лелабераша.
«Из хетаяь хургья къаман Ӏадаташ лорадара. Из дош лоархӀаме а да, хӀана аьлча цунна чудоагӀа эхь-эздел, Даьхенцара безам совбоаккхаш, кагирхошта кхетам луш хилар. Карарча хана массайолча моттигашка лоархӀаме да къаман Ӏадаташ лорадар», - аьлар мехка кулгалхочо Келаматанаькъан Махьмуд-Ӏаьлас, российски культуран керттердар дувцаш.
Цо белгалдир, Россе бахача дукхача наха дагадоагӀа, советски ханашка баьха тайп-тайпарча къамий викалаш шоайла мишта безаме бар, дег чура лоархӀаш, дика гӀулакха дӀа-юха леладеш бар. Цо таро лора наха шоай культура лорае, машар лоаттабе, кхыдолча къамий Ӏадаташ лархӀа. Берригаш а цаӀ дола советски къам дар.
«Вай Президента Путин Владимира дӀахьоча къаман политико тахан а тӀахьех къамаш дикагӀа йола оамалаш, къаман Ӏадаташ леладара, уж чӀоагӀдара, къам дегӀадара цар пайда бахьаш хилар дӀа а лоархӀаш», - аьлар Макшарипа Махьмуд-Ӏаьлас.
Цо белгалдир, вай российски паччахьалкхен низ а йоккхо а я, цун къамаш дукха хиларца, цох лаьца дукха а дийцад Российски Федераце Президента.
Россе хӀара къам ше морг кхы цхьаькха доацаш хилар, цаӀ йолча Россе дезала цхьа дакъа хилар лораду. Тахан паччахьалкхен кулгалхочо, Россе берригача бахархоша къахьег хьамсарча Даьхен кхерамзле лораяра, мохк дегӀабоалабара тӀехьа.
