ГIалгIайчен МВД ветеранаша шоашта ховр хьийхар, хIанзарча полице болхлошта
Наьсаре МВД ветераний кхетаче хилар, тахан болх беш болча полице болхлошца. Къамаьл даьраша дийцар, шоаш дукхача шерашка Iомаяьча балха говзалах, яхаш, хоам бу «Сердало» газетага ГIалгIай Республике гIолла йолча цу министерствос.
«Укх деношка, ГIалгIай Республике гIолла йолча МВД ветераний Совета, иштта Наьсаре гIолла йолча Россе ОМВД кулгалхоша ше вийха хиларах, ГIалгIай Республике гIолла йолча МВД ветераний Совета доакъашхо, хIанз салоIаш вола полице полковник ГIазгиренаькъан Муса ваха хилар полице болхлошца кхетаче дIаяхьа.
Шоайла къайле йоацаш, дIахьош хиннача къамаьле, дукхагIа белгалдеш хиннар дар балха тIа пайда эцар, цун керттера декхараш довзар», - йоах хоамо. Ший хана из декхар дика довзаш а кхоачашдеш а хьавенача, хIанз салоIаш волча полковника къонабарашта хьалхадаьккхар, нахаца безаме а ший балхаца бехктокхаме а хила везар.
Юххера а цо даькъалабийцар полице болхлой; уж могаш а, ираз долаш а, шоай балха тIа дика толамаш доахаш а хилар ловш долча дешашца. Белгалду, цу тайпара кхетаченаш эшаш хилар, тIехьа тIадоагIача ноахала хьаэца пайда хул цунах. Мехка цхьацца йола чоалхане моттигаш чу а лоацаш, лерттIа къахьегача накъадоал цига деш дола хьехар.
