Мехкара хьал тоаде дагахьа, къахьегаш ба мехка
Республикера вахара-экономикан хьал ма хулла тоадара тӀехьа, боккха болх дӀакхухьаш ба мехка хьалхалаттараш. Цу юкъе керттера моттиг дӀалоацаш да наькъаш тоадар. «Сердалога» из хоам бу Мехкадаь зарбан болх лелабераша.
«Наькъашкара болх тӀатеӀӀа дӀахьош латт тахан. «Кхераме доаца дика наькъаш» яхача беркатеча проектага гӀолла тоабеш латт Наьсарера Шаймиева оалаш бола урам. Цу проекто хьагойт мехкахошта, къаман проекташ мел беркате, боккха пайда боаржабеш я.
Майски яха юрти, шахьари вӀаший хотташ бола урам тоабаро дикка аттачахьа доаккхаргда цига леларий хьал», - белгалдир вай Мехкадас Келаматанаькъан Махьмуд-Ӏаьлас, кхоачашбе безача балхах дувцаш. Иштта мехка кулгалхочо хьоахадир, 2024-ча шера мехка хьалхашка доккха декхар латтилга - 28 км кхоачаш дола накъаш да тоаде дезараш.
Машинашта дӀа-хьа лела чӀоагӀа паргӀата болаш хургба Шаймиева оала урам, никъ тоабаь баьлча. Ахкан хьалхарча бетта 30-ча дийнахьа, тоабаь йистебаьнна хила безаш ба никъ, къоастаяьча ханага диллача.
