Красноярскерча яхье дакъа лоацаш хилар вай латархой
Кхозза олимпийски чемпион хиннача Сайтиев Бувайсара совгӀат даккхара йолча шоай лоӀамерча латара къамашта юкъерча яхьашка дакъа лоацаш хилар вай мехкара латархой. Красноярске дӀайихьача цар гулваьвар 300 совгӀа дикагӀвола спортсмен. Дото, борза майдилгаш йоахаш белгалбаьлар цига вай мехкахой.
«Пхезза араваьлар дотув даьккха СапарӀаланаькъан ИсмаӀал. Красноярскерча спортсменаца летар из эггара хьалха 12-0 хулаш, тӀаккха Казахстанерча латархочунца (10-0), Тыверча викалца (9-2), Якутера веначунца (5-0), эггара тӀехьара латар Забайкальера спортсменаца хилар (6-5).
55 кг дозал дарашца летача борза майдилг яьккхар Чаненаькъан Заьлмахас. Пхезза араваьлар вай спортсмен – Арменерча (8-2), Тыверча (3-2), Якутерча (13-0), Селий мехкарча (5-1) спортсменашца лата», - дийцар «Сердалога» спорта гӀулакхех йолча Министерствос.
Дикка къахьегаш хиларах, белгалбаьннаб вай спортсменаш, баркал ала доагӀа цар хьехамча волча Ганенаькъан Беслана.
