Суртанча йолча Ильясанаькъан Индирас Къаман библиотеканна совгӀат дир
Суртанча йолча Ильясанаькъан Индирас совгӀат дир, ГӀалгӀайчен Янданаькъан Жамалдий цӀерагӀча Къаман библиотеканна. Паччахьалкхен исбахьален искусствай музее дӀахьош «Дог а са а делаш хилар» яха лаьрххӀа бола гойтам бар, иштта «ГӀалгӀай паччахьалкхен 100 шу дузаш хиларца дувзадаь, ИЗО музейна ханорг делар.
Ильясанаькъан Индира - живописа, графикан, кулга говзалца еча хӀамай искусствон говзанча, ГӀалгӀайчен культура болхло я.
Цо диллад гӀалгӀай кхалсага «Нана» яха дагалоаттама сурт. Цун балха тӀа йолча говзалах пайда эцаш, Малсаганаькъан А. хьаяь скульптура латт ГӀалгӀайчен столице. НачӀал долча суртанчий балхашца кийчдаьд шин томах латташ дола «Ашарий атлас. ГӀалгӀайче». Из дӀадахача шера кепа теха арадаьлар, – аьлар «Сердало» газетага ГӀалгӀай Республикан Къаман библиотекан зарбан болх лелабераша.
Дукха ха йоацаш, Ильясанаькъан Индирас ГӀалгӀайчен керттерча библиотеке дешархошта лаьрхӀа говзанч-хьехам белар. Суртанчас Ӏомадир бераш къоаламца сурташ дехка, иштта царна яйзар шаькъаца сурт диллара къайленаш а.
