Магӏалбикерча ӏаьдала болхлоша, къонача эскархоша наькъашка лоралуш хилара тӏахьех бахархой
Мехкарча наькъашка хатараш даржарах, ГИБДД болхлошца бахархой лоралуш, сабаре хилара тӏахьехаш бола болам хьаллаца арабаьлар Магӏалбикера къона эскархой. Шахьарерча №20 йолча ишколера къонача эскархой тоабан доакъашхой бар цу дийнахьа дакъа лоацаш хиннараш.
«Сердалога» баьча хоамах, полице болхлоша машинаш сецайора, хӏаьта къонача эскархоша наькъашка фийла, сабаре хилар мел лоархӏаме да хьалхадоаккхаш къамаьл дора нахага. Цул совгӏа, из деррига белгалдаь дола каьхаташ а дӏадийкъар бахархошта. Машинаца араваьнна саг сабаре, ший санна шийна гонахьарчар, цӏагӏа шийга хьежачар уйла еш хила веза!
Наькъашкара бокъонаш хӏаране лорайойя, хатараш кӏезигагӏа хургда – из деррига хьалхадоаккхаш болам бар шахьаре дӏабихьар. Сага вахарал дезагӏа хӏама дац, из кхета а деш, наькъашкара гӏулакх боаггӏача боараме лораде деза вай тахан.
Иштта бола болх дӏахо а дӏабахьа лерхӏ шахьаре, наькъашка нийслуш долча хатараша тахан чӏоагӏа сатем боабаьб наьха.
