Уж яхьаш дIаяхьалехьа балха дикал лакхъеш йола дукха мероприятеш вIашагIъехкаяр, цул совгIа мастер-классаш а елар цIихезача атлеташа. Цу тайпара дзюдох лакхара говзал гойташ йола мастер-класс ялар «Руднев Руслана» Кубка къонача доакъашхошта, дзюдох йолча халкъашта юкъерча класса дзюдох цIихезача спорта мастера, Европа Хьалхленна геза котвалархочо Къоастой Альберта.

МагIалбика районерча спортсмений команда хилар, къонабарий яхьашка дакъалоацаш.

Вай регион лакхача боарам тIа гойтар цар.

Цудухьа яхьай чаккхе еш, гуш хилар вай мехкахоша хьалхара моттиг яьккхалга. Из толам баьккхарашта юкъе ба: Габасов СайфуллахI, ТIоаршхой Iаьла, Арчакханаькъан Iаьла, Тоачанаькъан ИсмаIал, Къоастой ИсмаIал. Цар яьккхар йиъ дошо, цаI геза моттиг.

Вай атлетий спорта хьехамчаша, иштта цар даьша-ноаноша баркал оал Самарски областерча ГIалгIайчен массанахьарча викалашта, иштта моттигерча гIалгIай диаспора викалашта: Кхоартой Хьусена, КацIанаькъан Iийсайна, Хьулхой Тимура, Хаьшанаькъан Ислама, Нальганаькъан Мухьмада, кхыболча мехкахошта, вай къонача спортсменашта Самаре уж болаш цар даьча новкъосталах.

Цар белгалду, уж дIакхачарца шоай гIулакхаш а дита цига тха берашта уллув хилар Кхоартой Хьусен, КацIанаькъан Iийса, яхаш. Царна мел эшар лоаттадеш, йоккха терко йир цар цига Iодахача берашта.