75 эзар совгӏа туристаш хиннаб вай мехка укх аьхки
Ахкан ха латтача юкъа, 75 эзар совгӏа туристаш ба вай мехка кхаьчараш, хӏаьта ер шу доладелча денз, вайцига салоӏаш хиннараш 94 эзар саг ва.
Туристически оагӏонца дувзаденнараш тоадеш боккха болх ба мехка тахан дӏахьош латтар. Туристически керда наькъаш хьаделлаш, салоӏа моттигаш тоаеш, иттнел совгӏа проекташ йоаржаяьй мехка. Хӏаьта тӏехьарча диъ шера хьаьшашта йола фусамаш 33% - га кхоачаш дукхагӏа хиннай. Иштта кхы а кхаь кердача наькъа паспорташ дӏаденнад.
Ахабоарзен ор долча ягӏа Зем гӏала йолча гӏаш никъ беш тӏакхачар, Ушкорт яха лоам болча кхачар, Гаьл-Чӏож яхача кхуркхолга, гӏаш водаш, тӏакхачар да цу юкъе. Машинашцара туризм хоржараш а шортта ба тахан. ӏилман оагӏонцара туризм а дикка яржаш латт, археологически тохкамаш, лоаман моттигашка къахьегаш йола гӏалаш тоаяра ишкол бахьан долаш.
«Туризме лоархӏаме да культураца дувзаденнараш. Музейшка, гӏалай моттигашка, исторически сийленгаш долча лелаш гӏалгӏай къаман ӏадаташца дувзаденнараш довзаш ба мехка тӏаухаш бола хьаьший», - белгалдир вай мехкадас Келаматанаькъан Махьмуд-ӏаьлас.
Къаьстта боккха болх ба лоаман моттигашка дӏахьош латтар ма хулла кердадараш, таьрахьашца дувзаденнараш, наькъашка лелалара эша гӏирсаш юкъедоахаш. Хьаьшашта лаьрхӏа цӏенош тоадеш, цар кхерамзлен хьал лорадара тӏехьа къахьегаш ба тахан мехка.
Иштта туризме къахьега из гӏулакх боаггӏача боараме дӏахьоргдола болхлой кийчбеш программа я вай мехка йоаржаяь, 2027-ча шерга кхаччалца. Эггара лоархӏамегӏа йолча проектех я «ӏарамхи», лакхача боарамга кхоачадеш тоаде лерхӏ цу моттига хьал.
