Россе культуран Министерствос грамота елар, къаман библиотекан кулгалхочун гӀончанна
Россе культуран гӀулакхех йолча Министерствогара грамота луш, белгалйир къаман библиотекан кулгалхочун гӀонча йола Малсаганаькъан Лида. «Россе эггара толашагӀа болча болхлошта юкъе нийсъелар вай мехкахо.
Библиотеке къахьегаш, цо дукха шераш дӀаденнад. Авторски проекташ йоаржаеш, дукха лоархӀаме кхетаченаш дӀакхухьаш болх баьб цо. ГӀалгӀай къаман истореца, культураца дувзаденнараш лорадара, дийндара тӀехьа дикка къахьегаш лаьттай из», - дийцар «Сердалога» библиотеке. Грамотаца майдилг елар вай мехкахочунна.
Истореца дувзаденнараш лорадара тӀехьа болча оагӀонца белгалъяьннай Малсаганаькъан Лида; Сийлахь-боккхача тӀем тӀа Котало яьккха 80 шу дизара, Даьхен лорбой Шера хетаяьча конгрессе.
Библиотеке къахьегар Лидайна дега чӀоагӀа гарга хиннад массахана. Вай мехкара библиотекай гӀулакх тоадара тӀехьа доккха дакъа лаьца саг я из.
Россе министерствос тахан цун болх лакхача моттиге оттабар вай массане дегашта тоам беш да, хӀана аьлча из саг ший гӀулакх дика Ӏомадаь, бехктокхаме къахьегаш, ший балха тӀа белгала йолаш хиннай массахана.
