ЦӀихеза кхоллама болхло волча Цхьорой Аюпа ше баь болх белар музейна
«Ӏаьржа таьзет» яха ше кхелла болх белар Паччахьалкхен музейна вай мехкарча цӀихеза суртанча, кхоллама болхло волча Цхьорой Аюпа.
1944-ча шера бӀарчча гӀалгӀай къам, цхьаккха бехк боацаш, мехкахдаккхара тешал деш бола цхьаькха, лоархӀаме болх ба Аюпа ший кулгашца кхеллар. «1944-ча шера, гӀалгӀай лоаман юрташка боагабаь нах бицболийтаргбоаца болх ба из. Царна юкъе хиннаб ха яха, могаш боаца, лоаман готтача наькъашка гӀолла шаьрача ӀокӀалбала, гӀаш дӀабаха ди доацараш, бераш, кхалнах. Вай къаман истори гойташ дола балхаш дӀахо а кхолла лаьрхӀа ва Аюп», - дийцар «Сердало» газетага Паччахьалкхен музея зарбан болх лелабераша.
Музея болхлоша доккха баркал аьлар из болх кхоллаш къахьийгача Цхьорой Аюпа. Къамах дог лазачар къахьегаш, хӀара денгара денга хьалъюзаш латт вай мехкара музейш.
