Гӏалгӏайчен вахархо уголовни гӏулакха юкъевахар, Пхьилекъонгий-Юрта ДТП хинначул тIехьагIа
Наьсарен кхален МВД тохкамхочо Илдарха-Гӏала вахархочун духьала уголовни гӏулакх хьадийллар; цо регистраци а номераш а йоацаш автомобиль кхалсага тӏатохарах, яхаш, дийцар «Сердало» газетага Гӏалгӏайче гӏолла йолча Россе МВД зарбан болх лелабераша.
Тхоца къамаьл даьчо яхачох, из наькъа хатар нийсделар тов бетта 4- ча дийнахьа 18:00 сахьат даьннача хана Пхьилекъонгий-Юрта. Тохкамхочо яхачох, 54 шу даьнна моттигера яхархо ший юртарча Осканаькъан урамах наькъал дехьа - йоалаш хиннай, цунна Toyota Camry яха машин тӏакхетача хана. Из автомобиль регистраци яь а, иштта паччахьалкхен регистраци хилара белгалонаш йолаш а хиннаяц.
Цу ДТП юкъе лозаяь кхалсаг сиха Гӏалгӏай республикански клинически дарбанче дӏайигар.
Полице болхлоша, лоаццача хана, хиннар тохкаш болх дӏабихьар. Наьсарен кхале гӏолла йолча Россе ОМВД, 1970 шера ваьча цу водитела духьала уголовни гӏулакх хьадийллар РФ УК 1 даькъа 264 статьях (наькъа бокъонаш цалораярах, сага човнаш ярах).
Карарча хана из саг лаьца воалл. Тохкама болх дӏахьош ба.
