ШоллагӀча дийнахьа а хоржамашка дакъа лацар хьаллоацаш бар лоаман бахархой
16.03.2024 10:47
ЖӀайрахьера хоржамаш ду моттигаш нахах хьалйизза яр. Мехкарча избиркома яхачох, 41,56% наха дакъа лаьцад хоржамашка хьалхарча дийнахьа. Ӏуйре хьахиларца шоай декхар кхоачашде арабувлаш бар нах. Цох лаьца «Сердало» газетага дийцар Лаьжгерча № 103 йолча хоржамий даькъ тӀа.
«Балха ухача наьха хьалхарча дийнахьа вӀаштӀехьадаьннадацар укхаза хьабахка, цудухьа шоллагӀча дийнахьа Ӏуррехь арабаьннабар уж кхадж тасса. Дог айденна, шоашта тӀалаттача декхара бизза лоархӀам беш бар бахархой», - дийцар тха газетага хоржамий комиссен хьалхалаттача Хутенаькъан Мухьмад-Султана.
Лаьжгерча ишколе яр №103 йола хоржамий моттиг. Хоржамаш деча доазон тӀа лоархӀаме гӀулакх дӀахьош бар цу юрта массахана лакха лерхӀам беш бола хьехархой.
