Массехк даькъах республикан юкъе из яхь дӀайихьачул тӀехьагӀа, дикагӀвола даькъ тӀара участкови хургва вай мехка МВД сайта тӀа белгалваьккха. Цига хӀара сага таро хургья дикагӀвола болхло харжа, цун балха мах бе. Карарча шера лайчилла бетта, цига котбаьннарашта лаьрххӀа дола совгӀаташ лургда, из нийслургда полице даькъ т1арча болхлочун Ди долаш. Полице даькъ тӀара болхлой — уж ба бокъонаш лораерий мугIарера нах, царга кхайк хьалхарча аргӀагIа бахархой, цар кхоачашду дукхагӀа дола наьха хьашташ. Цар хоза хьехар а ду, тайп-тайпарча юридически оагӀорахьара нийсачох нах дӀакхета а бу. Нагахьа санна зуламхо вале, из саг хьа а лоац. Дукха нах бовзаш хиларах, даькъ тӀарча полице болхлочоа ховш хул мичахьа фуд, вахарца дувзаденна наха дагадоаллар фуд, кхы дуккхадараш.