Курски областерча наха лаьрхӀа, гуманитарни мухь гулбир МагӀалбике
06.08.2025 16:54
ТӀом бахьан долаш, халача хьале эттача Курски областерча бахархошта лаьрхӀа хӀамаш яхьийтар МагӀалбикерча наха. Шахьара администраце ше хьалхаэтта дӀадихьар из гӀулакх.
«Вахаре цу наха эшаш йола хӀамаш чуйола яьшкаш яр МЧС болхлошка кийчъяь дӀаеннараш. Вай мехкарча МЧС-га гӀолла дӀакхоачаргба из мухь Курски областе»,- дийцар «Сердало» газетага шахьара администраце болхлоша.
Хала ханаш эттача, адам вӀаший гӀо деш, оагӀув хьаллоацаш, къахьетаме хилар эггара лоархӀаме долча декхарех да. Россе дахаш дола къамаш массахана шоайла гӀо де отташ, вӀаший новкъостал де кийча хилар хьагойтад мехка исторе. Къаьстта хала денош латтача хана; шоайла къахетаме, могаш дола гӀо де хьожаш хила беза цхьан мехка бахаш бола нах.
